Службы Рожеству святителя Николы

никола волода.jpg

Прошу прощения у своих постоянных читателей за то, что пропустил здесь праздники в честь свв. влмч. Пантелеймона, Христа ради уродиваго Николы Кочанова, новгородскаго чудотворца, а также Смоленския иконы Пресвятыя Богородицы. Впрочем, об этих духовных торжествах регулярно писалось в прошлые годы. А сегодня новое, прежде не бывшее.
Вчера было Рожество святителя Христова Николы, архиепископа Мир ликийских, чудотворца. В наших старопечатных книгах имеется лишь тропарь и кондак сему празднику. Однако в рукописях встречаются полные службы, причём в двух версиях, полиелеосной и бденной. Публикую обе, а затем ссылку на историческую статью на ту же тему (где и тексты служб). И без Великого Новгорода там никак:) Молитвенные тексты несколько отредактированы в соответствии с дониконовской церковной орфографией. Добавлены также небольшие уставные указания, в помощь практически служАщим. Заинтересовавшихся прошу под кат.

Вариант 1, полиелеос

Месяца июля в 29 день

РОЖЕСТВО ИЖЕ ВО СВЯТЫХ ОТЦА НАШЕГО НИКОЛЫ АРХИЕПИСКОПА МИР ЛИКИЙСКИХ, ЧУДОТВОРЦА

НА ВЕЛИЦЕЙ ВЕЧЕРНИ

Блажен муж: Антифон 1:

На Господи возвах: стихеры на 8, глас 1

Подобен: О, дивное чудо:

Приспе день светлого рожества. ныне сошедшеся вернии, рожество творим. великаго святителя Николы. от благаго корени боголюбиваго отца Феофана. из ложесн от богонравныя матери своея Ноны. радуйтесь Феофане и Ноно, из них же спасение человеком родися. и кто доволен по достоянию возможет восхвалити. от Ноны днесь младеньствующаго Феофане радуйся. Ноно веселися, славяще Истинаго Святая. и Избавителя Исуса Единаго Господа.

Сей день веселия радуйтеся людие. се бо свету светилник от Ноны днесь преславно прозябе. всемирная радость от праведника возсия нам, от Феофана и Ноны, небесный престол Божий. приятелище чистоты. радость провозвещающе всему миру. житию нашему ходатай. и клятве взятие благословению подание. темже в рожество твое святителю богозванный. мир мирови испроси. и душам нашим велию милость.

Твое славят рожество, святителю Николае. разумнаго света заре. церковное светило святительская красота. царское украшение богопроповедниче богоходатайныи. блаженный разум свято прозябший гроздь. винограда животного вино искапил еси веселящее верных сердца. дряхльствующая же омрачением лести. упоеныя пияньством идольскаго гнева. всяк богоразумию привел еси. О святопомазанная главо, о всечестный верх . О всеблаженне и преблаженне , честный наш учителю прииди и посети нас, озлобленныя греховными страстьми. Христу помолися даровати душам нашим велию милость.

Ины стихиры, глас 2

Подобен: Киими похвальными:

Киими похвальными венцы. увязем святителя священству венца. благочестию управление. церкви светлое украшение. источника божественных исцелений. неисчерпаемого. пролитие дарований духовных. реку многих чудес, вселенную веселяща течением Николу добраго предстателя нашего и хранителя.

Киими смиренными устнами воспоем святителя дивнаго в чудесех. и бесплотным сожителя. освященнаго от пелен столпа церкви неподвижимаго. веселие земли нашей, правде правителя. сиротам питателя. обидимым заступника. больным врача безмездна.

Киими духовными песньми восхвалим святителя. печальным утешителя, отчаянным упование. ненадеющимся надежда. побеждаемым всем тепла заступника Божественаго Николу воспевающе. похвалу всем земнородным и всего священства украшение. реку милости воистинну Божественаго Христова смирения ревнителя. приидете верных собори псаломски восплещем руками и восхвалим святителя Христова и чудотворца Николу. подающаго мирови велию милость .

Слава, гл.8:

Приидите вси добрыи святителие убо цари же и князи и сановницы и вси людие. мужие же и жены. юноша и девы и всяк возраст и всяко достояние согласно воспоем. всечестное и преславное рожество Николы всеблаженнаго благочестия светило воздержания правило терпению столпа. простоте сокровище смирения руку независтную. нищим утешение, странным препитателя. истинныя любве Христовы. делателя воистину блаженаго. человекам верным заступника тепла. бедным помощника скора. болезнем и страстем неисцельным врача безмездна. и всяким недугом целителя преизрядна. тем убо ныне сошедшеся на всечестное его рождество. воспоем глаголюш . радуйтеся блаженная версто Феофане присно блаженна. и Ноно блаженная супруго всечестная. рождьшия светилника вселенней просвещающаго. и освещающаго душа наша.

И ныне. Богородичен в тойже глас. Царь Небесныи.

Чтения 3 святительские.

На литии стихеры, гл.8

Подобен: О, преславное чудо:

Святителю отче Николае,* ты еще во утробе матерни * святительства прозвание приим.* нареченное от Бога * ты из млада Христа возлюбил еси * прием от Бога паству словесных овец.* добре пасящи церковь Божию.* тем ныне празднуем всечестное твое рожество * радуися Христа величаем.

Святителю отче Николае.* испроси яже к Богу твоими молитвами.* церкви утвержение святителя.* покрый молитвою своею.* благоверным и христолюбивым людем нашим * победы дая на враги и одоления.* неподвижиму и необориму граду твоему были сподоби.* и верным людем грехов оставление испроси.* и всем призывающим всечестное рожество твое. прощение согрешением даруй.

Святителю отче Николае богомудре.* ты воистину явися наставник и учитель.* омраченная сердца наставляющи на истиный путь.* ты бысть нищим и убогим защитник.* сиротам и вдовицам заступник князем крепкое истязание.* святителем известное основание.* вельможам твердое наказание.* и всем верным притекающим к тебе с верою.* и чтущим всечестное твое рожество. испроси грехов оставление:

Слава, гл.6:
Всяк град и страна пресловущему святому храму сему срадуется днесь празднующе всечестное преславное рожество святителя Христова и чудотворца Николы. ибо дивный врач и спаситель наш великий Николае. небеснаго братества лечбы предлагает. к непрестанным лечбам всех тихо созва. не хитростьми человеческими не обязанием но действом Святаго Духа. душевное и телесное исцеление. паче естества подавая. егоже приемлюще доволне, родов всех и возраст славим Христа Бога подающаго его ради велию милость. воспевающим того всечестное и преславное рождество.

И ныне, гл.4

Преславная днесь. видим тленных естество на земли. яко Сыне Божий хощет родитися от Девы всечистыя отроковицы. яко богоглаголивый пророче Давыд. рече бо яко пророк сию предзря. одши виждь и приклони ухо твое. и слыши ныне преславная глаголаша о Тебе во всех Христос. град Божий и одушевленный странно глаголание. странно повеление странно рождение. ангелом благовещенно.

Или и ныне, Богор. по гл., Творец и Избавитель.

На стиховне стихеры самогласны, гл.4:

В семирная радость от праведнику возсия нам. от Феофана и Ноны. преславный святитель яже премногия ради чистоты. приятелище Святаго Духа, бывает того молитвами Христе Боже смирение миру ниспошли. и душам нашим велию милость.

Стих: И ты отроча* святитель вышняго наречешися.
П роцвел яко финикс давыдски отче. и обитель явися Пречистому Духу. и славна тя вселенней показа. тем убо ныне о нас Христу непрестанно. молися. почитающих верою всечестное рожество твое. Николае всеблаженне.

Стих: У ста праведнаго поучатся премудрости*и язык его возглаголет суд.
Д несь благоплодная Нона. раждает отроча богоизбранное в жилище всех Царя и Зиждителя Христа Бога веселися убо Феофане радуйся Ноно. торжествуйте вси земнороднии ликовствуйте духовно вси празднолюбцы. в преславное рождество святителя Христова и чудотворца Николы. молящася Христу Богу непрестанно за душа наша. [26]

Слава, глас З:
П риидите вси празднолюбцы. честное рожество святителя Божия Николы. восхвалим вопиюще к нему и глаголюще: дар от Бога приял еси. святитель Божий Николае всех христиан недуги исцеляти от бед избавляти. и грехи отпущати от пленения спасати. от горкия смерти избавляти и от всякия нужа и печали. но и нас не презри святителю Христов Николае. веси бо иже требует здравия телесем и душам спасения. тем убо сердечне. и ныне к тебе припадающе вседушевно кланяющеся телесне молящися умилно. помяни убо и нас во святых своих молитвах ко Господу. да не погибнем за умножение грех наших, покрый нас от всякаго зла и лютых напастей на тя бо уповаем и твоего всечестнаго рожества. праздник чтущи Тя ублажаем.

И ныне, Богородичен в тойже глас: Без семене.

НА УТРЕНИ

Тропарь, глас 4:

Т аинодерзновенне уподобился ecи мудре, царя бо обличил еси, ангелом двократы избави три мужи от смерти. тем по успении твоем сияеши чюдесы отче наш Николае. моли Христа Бога спастися душам нашим.

Кондак, глас 4:

В мирех рождейся святителю Николае. от благаго корени боголюбиваго отца Феофана из ложесн от богонравныя утробы матере своея Ноны. проразумел еси путь спасения. исполнися множество чюдес преподобне быв. сего ради освятися и явися велий таинник Божия благодати.

Седальны, и канон, и хвалиты из службы декабря в 6 день, точию катавасия Отверзу уста моя.

Вариант 2, бдение

Месяца июля в 29 день

РОЖЕСТВО ВЕЛИКАГО СВЯТИТЕЛЯ И ЧУДОТВОРЦА НИКОЛЫ

НА МАЛЕЙ ВЕЧЕРНИ

На Господи, возвах: стихеры на 4, глас 1.

Подобен: Небесным чином:

Ныне светло празднуем святителя и чудотворца Николы преславное рожество, от праведнику бо возсия нам, от добляго Феофана и благочестивыя Ноны, великий светильник святитель Христов, просвещает наши сердца и помышления.

Ныне, святителю Николае, душа твоя пребывает в горнем Иеросалиме со святыми ангельскими силами и во славе праведных, но свыше, святителю, и нас назирай, празднующих любовию день рожения твоего.

Ныне отечество твое, святителю, град Ликия светло празднует во святем и славнем рожестве твоем, и мы с ними купно веселящеся, вопием: "Ты еси, отче, похвала наша и утвержение".

Слава, глас 4:

Всечестное твое рожество, отче Николае, ангел множество на небеси и человеческий род на земли, честно ублажает, яко святитель Вышняго во святем рожестве твоем пронаречен еси, Того моли о нас, не престай молимся, яко на тя упование полагаем, святителю Николае.

И ныне. Богор. по гл. от малых.

На стиховне стихеры, глас 2.

Подобен: Доме Евфрафов.

Днесь ныне, земнороднии, приимите чистоты рачителя, духа божественаго приятелище, Ликиом славу и всем земным удобрение.

Стих: Праведник яко финик процветет*и яко кедр иже в Ливане умножится.
Приидите ныне празднолюбцы светло торжествуем в честнем рожестве великаго отца и таинника Христова.

Стих: Насаждени в дому Господни*во дворех Бога нашего процветут.
Приидите сошедшеся с Давыдом вкупе возопием днесь род правых благословляется, от праведных родителей святитель Вышняго нам раждается.

Слава, глас 4:

Всемирная радость, от праведник возсия нам днесь рожество твое, святителю отче Николае, иже премногия ради твоея чистоты храм Божий одушевлен явился еси и во святителех предивен познаваешися того молитвами Христе Боже мир мирови низпосли и душам нашим велию милость.

И ныне, Богородичен по гл., от малых.

Тропарь, глас 4:

Чудное и славное рожество твое, святителю Николае, церковь днесь православных светло празднует, ибо стоянием ногу твоею яви тя Господь и произвести бо быти светильника и учителя мирянам весь мир обогащающа и просвещающа чудесы, тем вопием ти: моли Христа Бога спастися душам нашим.

Слава, и ныне, Богор. по гл., Иже от века.

Ин тропарь, глас 2:

Днесь возсия нам, яко солнце торжество твое, отче Николае, ибо в рожестве твоем дивным стоянием ног твоих ангелы возвеселил еси, и человеки удивил еси, противныя же устрашил еси, темже ныне и Христова Церковь украшается яко невеста, и высоким гласом вопиет весело уяснися моя доброта прекрасно, приидите вернии, возвеселитеся и подимите спасение ваше и душевное нетление, в бедах скораго помощника, в скорбех посетителя, в мори обуреваемии тихое пристанище, алчущии питателя, слепии вождя, нищии богатство, старцы жезл, юнии наказателя и чистоте учителя, и вси притекающии с верою приемлют исцеление душам и телом.

Слава, и ныне, Богородичен: Вся паче смысла.

НА ВЕЛИЦЕЙ ВЕЧЕРНИ.

Стихеры, глас 2.

Подобен: Киими похвалными венцы:

Киими похвальными венцы, венчаем святителя в чудеснем рожестве его, плотию бо в Мирех суща, духовно же всех достизающа, и всю вселенную озаряюща, иже чисте того любящих, всем предстателя и заступника, и всем скорбным утешителя, благочестия столпа, верным поборника, его же ради шатания врагов Христос низложи, имеяи велию милость.

Киими песньми похвалим святителя в честнем рожестве его, нечестию сопротивоборца и благочестию поборника, Церкви первостоятеля, великаго защитника и учителя, и теплаго пособника, злославныя посрамляюща, потребителя Ариева, его же ради сего шатание Христос низложи, имея велию милость.

Киими духовными пенми и песньми восхвалим святителя во славнем торжестве его, далече бо сущая провидяща и отстоящая яко близ суща, и в рожестве своем стояние честных ног пророчествующа неложно, еже всей вселенней хотящи быти назирателя, и обидимым избавителя, царем окормителя, и связанным разрешителя, и от неправедныя смерти свободителя и всем дарующа верным велию милость.

Слава, глас 6.
Святителем удобрение и отцем славу, источника чудес неисчерпаемаго и верным заступника великаго, сошедшеся, о празднолюбцы, цветы добродетелей вземше, песненными похвалами воспоем, глаголюще: радуися, в Мирех Ликийский рожденныи и всему миру вожделенныи, верным хранителю и наместниче честныи и столпе непоколебимыи. Радуися, светильниче всесветлыи, иже мирския концы просвещая чудесы. Радуися, печальным божественое радование и обидимым теплый поборниче. И ныне, всеблаженне Николае, не престай моляся Христу Богу о чтущих верою и любовию присно радостную и всепразднественную память рожества твоего.

И ныне, Богор.: Кто Тебе не блажит.

Чтения 3 святительския.

На литии стихеры, глас 2:

Отче Николае, аще и Мирская страна израсти тя, но мир весь, иже тобою просвещенный мирными благоухании и чудес множеством, взывает похвальными песньми. И спасшийся тобою неосуждени, с сущими в Мирех, и мы поюще вопием: моли спастися душам нашим.

глас 4:

Отче Николае, закона судьбами, яко сад при водах насажден бысть и в дому Божий преславно процвел еси и всех верных чудесы предивными возвеселил еси, тем же и ныне прииди, отче, посреде нас невидимо и озари нас от Бога данною ти благодатию во светлем сем торжестве, в честнем твоем рожестве, богоносе Николае.

глас 8:

Доблестей твоих, преподобие отче, плоды просветил еси верных сердца чудесными блистании. Кто бо слыша о сем не удивится, яко во святем рожестве твоем стоянием ног твоих предивен и непреклонен явился еси, досточудне Николае. Тем же и нас поющих и хвалящих тя присно избави от враг видимых и невидимых твоими к Богу молитвами и спаси душа наша.

глас той же:

На хвалу потекл еси Господню, Николае, во временней жизни, и Той тя прослави на небесней истинней жизни. Тем же дерзновение стяжав к Нему, моли спасти души наша.

Слава, глас 6:

Днесь верных собори сошедшеся, воспоем вкупе согласно предивнаго отца святителя Николы торжество, зачатие бо его честно, и рожество его свято, и во младенчестве его дивная всем явишася, темже вопием ему: сосуде святоизбранный, столпе и утвержение Церкви, Царствию наследниче, непремолчи вопити о нас ко Господу.

И ныне, Богородичен: Т ворец и Избавитель.

На стиховне стихиры, глас 5.

Подобен: Радуися:

Радуися, явивыися деннице пресветлая, пребезначальнаго света Владыки. Радуися, заре тайнаго света, иерархе Христов Николае, предвари и подвигни пречистыя твоя молитвы о нас ко Господу, празднующих верою память рожества твоего, во еже избавити нас от всякия напасти и лютыя наша болезни исцелити. Отче, тебе бо заступника имамы и умильно с верою вопием ти: молися о нас Христу Богу даровати нам велию милость.

Стих: Праведник яко финикс процветет*и яко кедр иже в Ливане умножится.
Радуися, главо преосвященная и Богу вожделенная, и от праведных родителей якоже вторый Самуил в дар Богу возложенныи, и явился еси честное добродетелей жилище, бодреное правило непорочнаго священства пастырю добрый и пресветлый, превеликии светильниче, иже победоподобное носяи имя, требующих милостивно прошения исполнявши, приклонялся к молитвам молящихся. Граде спасенныи и одушевленныи, притичующим к тебе избавителю готовейшии, всем верою поющим твое преславное торжество, даруй нам велию милость.

Стих: Н асаждени в дому Господни*во дворех Бога нашего процветут.
Радуися, честныи грозде зрелаго плода, от праведнику ныне явился еси яко пресветлая заря, и всем нам предивен познаваешися, отче Николае, честныи уме, Троицы честный сосуде. Столпе церковныи, верным утешение, побеждаемым помощь, и ныне во светлем торжестве рожества твоего богоприятными твоими молитвами разори напастей и скорбей наших тьму, святителю Николае. Ты бо еси истинныи и любезныи пастырь и отец наш, и мы овцы пажити твоея и в помощь тебе призываем, даруй нам велию милость.

Слава, глас 2:

Приидите, христоименитых людей собор и всех верных сословие, днесь ныне в лице ставше и светлым гласом возопием: блажен еси Феофане, яко такову отроку быв родитель, хотящаго родити словом учения многих ко спасению. Блаженна ложесна твоя, Нонно, имаже носила еси, и красна сосца твоя, имаже воздоила еси хотящаго напитати душетленным гладом тающия. Блаженно отчество ваше, град Ликия, и вся окрестная его, но помолимся вама блаженная, еже молити его о нас, да испросит у Христа мира мирови и душам нашим велию милость.

И ныне, Богор. глас той же: О чудесе новаго.

НА УТРЕНИ

На Бог Господь: тропарь святому, 2жды. Слава и ныне, Богородичен воскресный по гл.

По 1-й стихологии седален, глас 1.
Подобен: Гроб твой.

В Мирех рождься, святителю, миром разумно духовным явися помазан, отче Николае, темже миры чудес твоих мир облагоухал еси, миро приснотекущее проливая, иже мирными твоими благоухаемыми чудесы почитающих торжество твое и нас, раб твоих, обогати. 2жды.

Слава и ныне, Богородичен:

Всем творца Бога же и Содетеля Всенепорочная, Чистая Духом Божественым в ложеснах заченши и тления кроме родила еси, Его же славяще, Тя воспеваем Дево, яко Палату Царя всех и миру заступление.

По 2-й стихологии седален, глас 8.

Подобен: Премудрости.

Источник чудес от Бога явился еси, мудре Николае, темже, отче, в рожестве твоем дивен явлься, всем бо верным источаеши спасеныя воды, от Бога благодать прием, темже дерзновение имея к Нему, моли о чтущих верою и любовию память рожества твоего, всеблаженне Николае. 2жды.

Слава, и ныне, Богородичен:

В кал греховный впадох и нет мне постояния, люте погрузи мя буря согрешений. Но яко рождьши Слова Единаго, Человеколюбца, на мя, раба Твоего, призри и избави всякаго греха, и страстей душетленных, и всякаго озлобления льстиваго врага, Богородице неискусомужная. Моли Христа Бога грехов оставление подати ми, Тя бо имам надежду, раб твой.

По полиелеосе седален, глас 5:

Ныне, отче святителю Николае, отечество твое град Ликия светло радуется, и вся Вселенная день рожения твоего честно празднует. Темже и мы днесь во храме твоем, сошедшеся вкупе с ними, похвальная приносим ти, глаголюще: радуися, отче Николае, всех покрове и заступление. 2жды.

Слава, и ныне, Богородичен:

Неискусобрачная Невесто, присно Дево, со святители непрестанно восхваляем Тя, яко Тобою нам величия сотвори Сын Твой и Бог Превечныи от Отца, иже в ложеснах Твоих вместитися изволивыи, да от лести свободит род наш.

Степенна, глас 4: Прокимен:

П раведник яко финик процветет и яко кедр иже в Ливане умножится.
Стих: Насажден в дому Господни:
Евангелие от Матфея. Зачало 11: В ы есте свет миру, не может град укрытися, верху горы стоя.

По 50 псалме: стихера, глас 6. Д несь верных собори сошедшеся. Писана на литии Слава.

Канон Пресвятой Богородице со ирмосом на 6.

Канон великому святителю и вселенскому чудотворцу Николе, глас 3.

Песнь 1.

Ирмос: Дивен в славах:

Дивен и славен еси Господи, творяи чудеса, разделивыи море, и воду из камене источивыи жаждущим людем, напои убо, Блаже, и мене росою Твоея благодати, да возмогу воспети угодника Твоего преславное рожество.

Дивное и славное рожество твое, святе Николае, от любве душевныя хощу похвалити, но недоумением содержим, боюся трепеща, зане вем, яко не красна похвала во устех грешников. Но обаче дерзая на благоутробие твое, славлю святое твое рожество.

Дивна воистину и славна, святителю, память рожества твоего, яко звезда утренняя посреди облак, и яко солнце сияя на церковь Вышняго, и яко дуга на облацех славы, тако сияет хвала твоя на тверди церковней, отче Николае.

Дивнаго и преславнаго святителя на преславное рождество христоименитиии стекшеся, усердно соберитеся и славу Господеви воздадите, яко дарова нам такова пастыря и учителя нелестна, и путеводителя, и от бед свободителя, еретиком же посрамителя.

Богородичен:

Дивна и преестественна тайна Рожества Твоего, Богородице, кии слух слыша не удивится богорожению твоему, яко во утробе Своей Создателя всех нетесно вместила еси, и паки Дева пребыла еси.

Катавасия: Отверзу уста моя.

Песнь 3.

Ирмос: Неплодная душе:

Неплодну имам душу аз окаянный, како тя могу похвалити, святителю. Воистину ты, отче, плод благохвальныи, душу мою плодоносну покажи, да возмогу воспети святое твое .

Неплодна быста родители твоя по рожестве твоем, святителю Николае. Естеству убо поведающу, яко не могут другаго такова родити, добродетельми же яко Авраам плодна и верна быста, того ради и мзду о вере своей от Бога тебе прияста.

Слава:

Неплодных чресл честное прозябение, святителю, слыша, кто не удивится, рождшуся бо тебе, святе. Воистину дивная о тебе яви Господь, трем бо часом неуклонно тебе стоящу на земли, идеже хотяше омытися, чудне Николае.

И ныне:

Н еплодных ложесн рождение, Пресвятая Владычице, но рождьши нам Христа Плода Бессмертнаго, питающаго всяко создание и смотрящаго всю тварь, Богородительнице.

Седален по 3 песни, глас 5:

О блаженная версто и благословенное супружество прекраснаго душею Феофана и боголюбивыя Нонны, божественным бо желанием совокуплени быста, и израстивша нам прекраснаго плода, чуднаго Николу, не токмо бо яко цвет шипка или крина при исхождении воды или стебло ливаново во дни жатвы, но истиннаго плода реку, отца сирым и вдовицам заступника, богатство нищим и болящим здравие и утешение, и сущим в богатстве окормление, старости подпор и юности обучителя, благочестия окормителя, еретиком же и бесом губителя. К немуже мы ныне возопием: отче святителю Николае, моли спастися поющим тя. 2жды.

Слава, и ныне, Богородичен:

Блаженна ложесна твоя, Богородительнице Дево, яко ширши небес явлвшася, словом бо составльшаго тварь во утробе Своей безсеменно имела еси, и во объятиих Своих нетрудно носила еси, тем молим Тя, Всеблаженная, еже молити от Тебе рожденнаго Христа, Бога нашего, во еже спастися поющим Тя.

Песнь 4.

Ирмос: Покрыла есть небеса:

Покрыла есть яко облак любы твоя и благодать твоя, юже имаши от Бога, святителю Николае, всех призывающих имя твое святое, всюду бо неоскудно подаваеши и коегждо прошения исполняеши. Прииди и ныне посреди нас невидимо и посети нас, озлобленных грехми, любовию празднующих пречестное твое рожество.

Празднуется и украшается рожеством твоим, святителю, яко монисты Церковь Христова, и невестски светло одевается и красуется, веселяся и вопия радостно, глаголя: приидите и видите желаемаго мною небеснаго гражданина и служителя Христова, днесь рождьшася от благоверну родителю.

Память рожества твоего, отче святителю, всем человеком бысть веселие. Покрый нас, отче всечестне, призывающих тя с верою и празднующих честно торжество праздника твоего, святителю Николае.

Похваляему бо праведнику возвеселятся людие, якоже рече писание. Днесь ныне мы грешнии, в рожестве твоем, отче Николае, радуемся и веселимся духовне, Христа славяще, иже тебе таковую благодать даровавшаго, яко Того хваления исполнь земля.

Богородичен:

Пресвятая Богоневесто, рождшая Христа, Правителя и Содетеля всем, немощьствующую душу мою исцели и настави мя на деяния благая, да всегда славлю Тя Преблагословенную.

Песнь 5.

Ирмос: На земли невидимыи:

На земли, отче святителю, явися верным твое святое рожество, воистину любезное торжество, якоже бо ливан в кадильнице или яко маслина износящи плод, тако нам память рожества твоего, отче милосерде Николае.

На земли днесь ныне, святителю, познан бысть и, яко от Бога познан был еси, прослави бо тя Господь в рожестве твоем, ибо стоянием честных ног твоих являя хотящее быти на тебе дарование.

На земли ныне церковь православных веселится, святителю Николае, и ликует с чады своими в памяти рождества своего, милосерде, и вопия глаголет: уяснися ныне доброта прекрасно и никогда же угаснет.

Богородичен:

На землю во чрево Твое, Чистая, яко дождь на руно сниде Господь и Бог наш, и от Твоих пречистых девических кровей плоть прием и чудодействова, и пострада, и взыде на небеса, с Собою возвышая праотца.

Песнь 6.

Ирмос: Г лубина страстей воста на мя :

Глубина страстей воста на ны и буря противных ветров, но предварив нас, отче святителю, и разори сопротиволежащий на нас совет лукаваго, и лукавых человек стремления хвалящихся о злобе своей, спаси ны от ни, милосерде Николае.

Глубине богатства Божия дивитися суть должно, дела же Божий славити зело есть лепо. Памяти же святых чтити велми есть полезно. Почтим убо и мы, братие, и возлюбим возлюбленнаго Богом святителя Николая, како во святем младенстве его дивная о нем показа Бог. Питаше бо ся, но не тако якоже обычай детем, в среду же и пяток единою касашеся, и то к вечеру, от леваго же сосца отнюд не ссаше, прознаменуя десное жития его.

Глубиною мудрости помышляяи о всех Господь прежде противных ветров тишину уготовляет, на Ариев убо плевел огнь вжигает, сего дивнаго реку и преславнаго святителя Николая рожество являет, по реченному от апостола Павла, егоже предуведе Бог сего и предизбра и оправда и прослави.

Богородичен:

Глубине таинству богорожения Твоего кто не удивится Пресвятая Дево Владычице, веком бо Творец вселися в Тя и плоть от Тебе приим умну и словесну, вся человеки обожи.

Кондак, глас 2.

Подобен: В Мирех святе.

В Мирех рождься, святе Николае, от благородна корене, яко благоплодна ветвь прозябл еси, исполнь бо бых божественных даров, яко солнце зарями весь мир чудесы просветил еси, сего ради прославляем тя, яко ученика и таинника Божия благодати.

Ин кондак, глас 3:

Яко звезда пресветлая просиял еси, блаженне Николае. Посреди Ликии града от праведнику родился еси, отче, и в честнем рожестве твоем чудна и славна тя показа Господь, и во святем младенстве твоем дивная явлена быша о тебе. Троицу бо проповедал еси трех часов стоянием честных ног твоих на земли в час рожения твоего, и от сосца деснаго питашеся, от леваго же никакоже, в среду же и в пяток единою и то во время вечернее, и оттого, отче, познан был еси воздержания нелестное правило, и яко имаши быти велий таинник Божия благодати.

Икос:

Приидите ныне с нами, братие, и купно духовне возвеселимся во святем торжестве богоноснаго отца нашего святителя Николы, и прославим преславно рождьшагося, и от утробы освященного, и Божественнаго Духа приимшаго, и святую Троицу в час рождения своего стоянием ног своих проповедавшаго, и всех человек удивльшаго, и хваляще святое и чудное рождество его. Любовию и правостию сердечною благодарная к нему сице рцем: Радуйся от матерних ложесн Богу возложенная и от Него усвоенная и освященная главо, сокрушивый проклятому сатане главу, Радуйся предизбранный и освященный сосуде и Богу возложенный и возлюбленный. Радуйся, царем правоверным помоще и окормление, и на враги победа и одоление, и православию утверждению. Радуйся, в Духа Святаго облеченный и на благодеяние благочестивым поданный. Радуйся, нечестивых потребителю и на страх их явленный. Радуйся, бесом прогонителю и еретиком обличителю. Радуйся, яко во святем рождестве твоем дивен всем познанный яко имаши быти великий таинник Божия благодати.

Песнь 7.

Ирмос: Трие отроцы в пещи:

От Троицы Бога проповедал еси, чудне Николае, темже и почести от Него венец приял еси, блаженне, и ныне в торжестве твоем усердно призывающих тя не забуди нас, раб своих, но свыше назирай, тя бо имамы крепка молитвенника.

Скрыжаль в сердцы своем от младенства, отче Николае, стяжав дивных добродетелей, написанну безсмертным пречистым перстом Христа Бога нашего, моли Его о нас, во еже написанным нам быти в книзе животней, святителю отче Николае досточудне.

Во святем рожестве твоем, святителю отче, Богом познан был еси и Бога познал еси, и весь бысть Божие жилище, весь явися орган духовный, возглашающ всяку добродетель богодохновенных пений спасения сказания и доброту являя Небеснаго Царствия, святителю Николае.

Богородичен:

С Богом Заступницу Тя стяжахом, Ты бо Божия Мати бысть Творца и Содетеля. И наше воображение приемша Всенепорочная, и сие спасша от тли и смерти и славою божественною прославльшаго.

Песнь 8.

Ирмос: Ангельми немолчно :

Ангели дивятся, видяще преславная в час рожения твоего, отче Николае, человецы же радуются, приемлюще тя яко своего благодетеля и к Богу молитвенника неуклонна, всем бо явился еси радость спасения, милосерде Николае.

Кто не почудится или кто не прославит имене твоего, отче святителю, слыша на тебе выше закона естественнаго бывшая знамения в рожестве твоем, и тем яви тя Господь светильника всему миру, во святем же младенстве твоем у матерних сосец показа тя изрядна и искусна, тем воистину воздержанию нелестный учитель явился еси, святителю Николае.

Вторыи Предотеча на земли явился еси на обличение беззакония, отче Николае. Ов бо обличи. Ирода беззаконновавшаго, ты же, отче, вся ереси далече от Церкве отгнал еси и вся соблазны и беззакония, яко хврастия, огнем ревности своея попалил еси, верных же утвердил еси, милосерде Николае.

Богородичен:

Дивлюся, святая Богоневесто, Владычице, таинству Богорождения Твоего, всех бо Содетель в Тя вселися, и все человеческое естество на небеса вознесе, прибегающих под кров Твой приими и спаси ны, Богоблагодатная Владычице.

Песнь 9.

Ирмос: Б лагословен Господь Бог Израилев:

Благословен еси Боже о всех, яже твориши, идеже бо хощеши, тамо побеждается естества чин, якоже и ныне в рожестве святителя Твоего выше закона естественнаго верным твоим дивная и пречудная явил еси, того молитвами, Христе, направи на путь мира.

Благословенна тя Богом, всем, отче Николае, благослови убо и мене поющаго святое рожество твое, и руку ми помощи простри, и приведи к тихому пристанищу покаяния, яко да всегда славлю тя, отче Николае.

Аще и много беззаконновах аз окаянный, не отступаю надежди, покрова твоего, отче Николае, всегда прибегаю и на тя надежду мою полагаю. Тем в нынешнем настоящем торжестве во святем твоем рожестве радостно вопию ти: ты мя, отче, избави от всякия скорби, и бед, и печалей, елика бо хощеши и можеши.

Блаженне и богоносе Николае, виждь тесноту души моея, како враг мой подвиже на мя брань на всяк день и не может истощити тула стрел своих, но присно ураняет мя и почити ми не даст. Аз же изнемогох, но ты, отче, сокруши козни его молитвами своими, яко да прием помощь твою святую, непрестанно славлю тя.

Богородичен:

Никтоже прибегая под кров надежди Твоея, Пресвятая Богоневесто, тощ исходит, но всяк просяи приемлет скорую Твою помощь, юже и мне подаждь, Отроковице, поющему Пресвятое Твое Рожество.

Светилен:

Воистину шлем и оружие на диавола непобедимое ты еси, отче Николае, от Бога явлен еси. Християном же поможение и утвержение, иерархом удобрение, в бедах же притекающим к тебе скорая помощь и заступление, святителю Господень. (дважды)

Слава, и ныне:

Облаче превышшии небес, радуися, искапающий нам каплю душеспасительную. Богородице, Ты Всеблагая, подаждь от Бога людем нашим победы на враги и междоусобия бурю утиши, елика бо хощеши, вся можеши, яко мати Господня.

На хвалитех стихеры на 4, глас 4.

Подобен: Дал еси знамение:

Дар благоприятен, от родительных рук Богу возложенныи, и от Него усвоенныи, и на пользу верным поданныи, святителю Николае, темже в тебе упокоися, благодать Пресвятаго Духа, славне, беззлобием возрастивши тя и мудростию украсивши.

Днесь память рожества твоего, святителю отче Николае, яко солнце нам Богоносия возсия лучи богатых даровании, просвещаеши чтущих тя и верою блажащих, мглу же лютых отгоняющи, и прошения верным исполняеши, тем тя, досточудне, почитаем.

Божественную благодать от Бога приял еси, святителю Николае, юже прием свыше, и нас назирай, празднующих любовию честное твое рожество, и подаждь от Бога церквам единомыслие, и людем нашим победы на враги, и миру умирение, и земли нашей благоплодие, и душам нашим велию милость.

Слава, глас 2:

От корене благаго благии прозябе плод, иже от младенчества освященныи, и якоже Самуил в дар Богу возложенныи, отче святителю Николае, Божиею бо благодатию паче, нежели млеком воспитанный, тем и на гору добродетелей взыде, преочищенну душу стяжав, и разум имея присно к Богу, небесное бысть жилище Духа, Христова обитель явися. Того, блаженне, моли о нес, еже спастися душам нашим.

И ныне, Богородичен: глас той же: Яко плодовита маслина Девая (от малых,в конце Минеи, в среду вечер гл. 2-и).

Таже славословие великое и отпуст. НА ЛИТУРГИИ Блаженны от канона святителю песнь 3 и 6 на 8. Апостол и Евангелие и причастен все святительское.


Источник текстов служб и ист. статья: http://www.voskres.ru/bogoslovie/tscherkasova_printed.htm#_ftn30
Почти нигде в старопечатных книгах нет "Николо" (разве один - два случая),везде "Николае". Но это звательный падеж,а именительный всё равно "Никола".
Пожалуй, ваших "умных" комментариев больше здесь не будет.